Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.176 | Dem. 18.179 (English) | >>Dem. 18.182 |
18.178μετὰ ταῦτα χειροτονῆσαι κελεύω δέκα πρέσβεις , καὶ ποιῆσαι τούτους κυρίους μετὰ τῶν στρατηγῶν καὶ τοῦ πότε δεῖ βαδίζειν ἐκεῖσε καὶ τῆς ἐξόδου . ἐπειδὰν δʼ ἔλθωσιν οἱ πρέσβεις εἰς Θήβας , πῶς χρήσασθαι τῷ πράγματι παραινῶ ; τούτῳ πάνυ μοι προσέχετε τὸν νοῦν . μὴ δεῖσθαι Θηβαίων μηδέν (αἰσχρὸς γὰρ ὁ καιρός ), ἀλλʼ ἐπαγγέλλεσθαι βοηθήσειν , ἂν κελεύωσιν , ὡς ἐκείνων ὄντων ἐν τοῖς ἐσχάτοις , ἡμῶν δʼ ἄμεινον ἢ ʼκεῖνοι προορωμένων · ἵνʼ ἐὰν μὲν δέξωνται ταῦτα καὶ πεισθῶσιν ἡμῖν , καὶ ἃ βουλόμεθʼ ὦμεν διῳκημένοι καὶ μετὰ προσχήματος ἀξίου τῆς πόλεως ταῦτα πράξωμεν , ἂν δʼ ἄρα μὴ συμβῇ κατατυχεῖν , ἐκεῖνοι μὲν αὑτοῖς ἐγκαλῶσιν ἄν τι νῦν ἐξαμαρτάνωσιν , ἡμῖν δὲ μηδὲν αἰσχρὸν μηδὲ ταπεινὸν ᾖ πεπραγμένον .”
18.179ταῦτα καὶ παραπλήσια τούτοις εἰπὼν κατέβην . συνεπαινεσάντων δὲ πάντων καὶ οὐδενὸς εἰπόντος ἐναντίον οὐδέν , οὐκ εἶπον μὲν ταῦτα , οὐκ ἔγραψα δέ , οὐδʼ ἔγραψα μέν , οὐκ ἐπρέσβευσα δέ , οὐδʼ ἐπρέσβευσα μέν , οὐκ ἔπεισα δὲ Θηβαίους , ἀλλʼ ἀπὸ τῆς ἀρχῆς ἄχρι τῆς τελευτῆς διεξῆλθον , καὶ ἔδωκʼ ἐμαυτὸν ὑμῖν ἁπλῶς εἰς τοὺς περιεστηκότας τῇ πόλει κινδύνους . Καί μοι φέρε τὸ ψήφισμα τὸ τότε γενόμενον .
καίτοι τίνα βούλει σέ , Αἰσχίνη , καὶ τίνʼ ἐμαυτὸν ἐκείνην τὴν ἡμέραν εἶναι θῶ ; βούλει ἐμαυτὸν μέν , ὃν ἂν σὺ λοιδορούμενος καὶ διασύρων καλέσαις , Βάτταλον , σὲ δὲ μηδʼ ἥρω τὸν τυχόντα , ἀλλὰ τούτων τινὰ τῶν ἀπὸ τῆς σκηνῆς , Κρεσφόντην ἢ Κρέοντα ἢ ὃν ἐν Κολλυτῷ ποτʼ Οἰνόμαον κακῶς ἐπέτριψας ; τότε τοίνυν κατʼ ἐκεῖνον τὸν καιρὸν ὁ Παιανιεὺς ἐγὼ Βάτταλος Οἰνομάου τοῦ Κοθωκίδου σοῦ πλείονος ἄξιος ὢν ἐφάνην τῇ πατρίδι . σὺ μέν γʼ οὐδὲν οὐδαμοῦ χρήσιμος ἦσθα · ἐγὼ δὲ πάνθʼ ὅσα προσῆκε τὸν ἀγαθὸν πολίτην ἔπραττον . Λέγε τὸ ψήφισμά μοι .
18.180
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.176 | Dem. 18.179 (English) | >>Dem. 18.182 |